Act 7 | ATA | STEP | Xe kisi'a ta aili'i mutalisou aloxo 'o, “Loxovaa, vaivaikala ane mitelonu noxine 'o anu manina?”

1 Xe kisi'a ta aili'i mutalisou aloxo 'o, “Loxovaa, vaivaikala ane mitelonu noxine 'o anu manina?” 2 ^aLa anu mukolinu aloxo 'o, “Ta vivilo, mo ta mamamilo. Ngalomu noxilo. Lataua e ta'itinu ualasou teitexi manina ne mupala'a noxou 'ilusunenge Avalaamu, mo no mine anu muxolu ne Mesopotamia io ulai ne Harani uao, la muvikalanu aloxo 'o, 3 ‘Natulu mo na'umesou lialiaxene mo ta temanu taasine, io nalai no anu lialia vile ane Eni alosienixu.’

4 ^bLa sou anu mulutu sou mu'umesou lialia noxi'a ta Kaludia io mulai sou muxolu ne Harani. Xe ili'i no mine Avalaamu momu musoli, mukalu, la Lataua mupalusou mune'e sou muxolu no anu lialia ane ngingi ngaxoxolu no anu 'o. 5 ^cIa Anu ulosou mii vile sou lexe anu na'u no anu lialia lai 'o uasi mo lialia sevile loxo tatulu no anu ne uasi. Ia Lataua musakii vaikala noxou lexe anu mo ta 'iu'ilusunu ili'i ne mulosi'a lialia ane ne loxo ane'i na'a sou ixolu no anu. Muvikala aloxo nesi io no voxo ane ne, la Avalaamu ne 'olu vile uasi. 6 ^dLa Lataua muvikalanu aloxo 'o, ‘Ta 'ilu'ilusuneni ne ilai la ixali loxo ta mitema vilemo no anu tuala va'axu mo ixali ta mitema sou ipalupalusi'asi mo ta mitema va'axu i'oxo masuane'i umomomo no anu tauu lele'e itemaxu itemaxu vile (400). 7 ^eIa Eni alosi'a ta mitema ane i'oxo masuane'i mo anu navunavu xe ili'i la ane'i ilaa ixexee no anu xalee tuala tila io ine'e ilotu noxilo no tuala ane 'o.’ 8 ^fLa Lataua muvikalanu Avalaamu sou lexe xooxoo ungasi'a aloxo sosovo sou mii ane Lataua musakiinu vaikalasou. Xe ili'i la Avalaamu muxalixu 'olu Aisaki, io Aisaki nenu mivo'onu mo voxo muxatele tatalu mukalu, la xooxoo mungasou. Xe ili'i, la Aisaki muxalixu 'olu Iakovo, la Iakovo muxali ta xaixasinge mavulovexa mo mulu'e no lia tamei, mami'a ane.

9 ^gIa xo ta xaixasinge mavulovexa mo mulu'e no lia vile ne miavuti la misangalakonu vimo'a vile ualasou lexe Iosepu, la sou misovanu mulai noxi'a ta mitema sou mi'oxonu muxali loxo itema sou ipalupalusousi ne Aixiputo. Mi'oxo aloxo ne ia Lataua u'umesou uasi. Anu musaxila'u laixe. 10 ^hMo musu'ulinu no anu tu'umaxu noxou, io mulosou xavutala laixe mole no mine anu ulai uvikala noxou mutuxu tuala ne Aixiputo e ualasou lexe Palao ne la anu uisuxu lavulavuu ne. La sou anu musosovosou sou muxali itema sou usaxila'u xalexalee tuatuala mo tanitani noxou mukalusi.

11 ⁱIa no voxo ane ne, la tauu soli tatila muxali no xalexalee tuatuala mukalusi ne Aixiputo mo ne Kanani kalumo. Aloxo ne, la muxalixu soli sou la'ilali toxoxa'a mole ta xaixasinge ne imomomo sou i'ani la uasi. 12 Xe Iakovo mulomu loxo 'o la lexe tuala tila ne Aixiputo ne la'ilali ta piena a muai no taataasou la'ilali. La sou anu mupalusi'a ta xaixasinge sou misokou muamua'i noxi'a sou milai ne Aixiputo ka milivu mine'e la. Xe la'ilali mukalu. 13 ^jLa sou ane'i milutu alaxu tameisou sou milai. Xe vimo'a Iosepu mupala'anixu lexe anu ne ane'i vimo'a ane. La sou motuxu tuala Palao mulavusi'a kalumo lexe ane'i ne Iosepu ta minuminu. 14 ^kXe ili'i la sou Iosepu mukala anaxui'a momu Iakovo ilo'a ta minuminu mukalusi e sosovosi'a muxali loxo itemaxu tatalu mo mavulovexa mo ta'uve (75) sou ane'i mine'e, 15 ^lmilu'e ne Aixiputo mole anu ilo'a ta xaixasinge mukalusi ne misoisoli a lai ne. 16 ^mMisoisoli lai ne la sou mitavutavulene'i milivunixi'a ne Sikemu sou milai mi'asixa'a no 'a tanixu lulusi'a e Avalaamu mulotonu noxi'a ta Amolu ne Sikemu.

17 ⁿNo mine voxo 'ala'alai sou Lataua mumasaxa lexe umomomo sou vaikala e musakiinu noxou 'ilusunenge Avalaamu la sosovosi'a ta mitema ne Isilaeli e mixolu no nano ne Aixiputo ne mulai teitexi manina. 18 No voxo ane ne la mutuxu tuala e musaxila'u tuala tila ne Aixiputo tei ne musoli, io vile alavua mune'e muno'u tanixu sou usaxila'u tuala tila ne Aixiputo ne ulavusou Iosepu ne uasi. 19 ^oAnu mumaisi'a ta Isilaeli no mine mixali ta piena mulolutu xe anu muavuti la mu'oxo loloxa'a sou lexe ipeine'i ta 'ili'a ta keakea ne mo sou isoisoli.

20 ^pNo voxo ane ne la Mosesi ne nenu mivo'onu kalumo. Mo anu uao keakeaxusi la Lataua mu'osasou manina, io mitalumeu muxolu no nano no tani noxou momu so'io tatalu. 21 ^qIa no mine ane'i mi'italonu mulai muxolu no ale, la mutuxu tuala Palao 'olu sema mino'u sou mituvu'u la muxali loxo ane 'ilie. 22 Xe Mosesi muxali tatila, la muno'u lavulavu mukalusi e noxi'a ta Aixiputo mo anu xaviinu mulolutu sou uvivikala xe umamaxa'u xaviinu kalumo.

23 Ia no mine anu tauu lele'exu itemaxu tamei mukalu, la anu mumasaxa lexe uxixao sou umaleisi'a ta tema taasou ta Isilaeli. 24 ^rXe anu muxixaosi'a aloxo ne, la mumaisou itema sie Aixiputo vile muvau itema sie Isilaeli vile, la sou anu muavuti mukolinu itema sie Isilaeli ne sou muvau itema sie Aixiputo ne musoli. 25 Mosesi mu'oxo aloxo ne xo anu muxavutala lexe ta tema tualasou ne imomomo sou ilavusou lexe Lataua musosovosou sou ulivunixi'a, ia ane'i ilamana no anu mii ane ne uasi. 26 Xe no voxo vile ili'i la, la Mosesi mumaisi'a ta Isilaeli tamei me'a mi'oto'oto. Ia anu mulai sou lexe utululune'i ilou, la mulai muvikalane'i aloxo 'o, ‘Ae, ngingi ngongou vivinesi a ne. Ia loxovaa la sou ngingi ngongou menge ngavilaisinge la loxo ne?’

27 Ia ane musokou 'oto'oto ne musounu Mosesi sou mutali'isou aloxo 'o, ‘'Ena'ei musosovosine sou lexe naxali nini itema sou naulaxunexi mo nailevinu 'ilixomexi loxo ne? 28 ^sNini na'oxo lexe navelo asoli loxo nevau itema sie Aixiputo vile musoli mei 'o?’ 29 ^tXe Mosesi mulomusou aloxo ne, la muavuti sou mu'ume avile mulai no xalee lia ne Midiani. La mutaula'i mole mupalane'i ta 'olu ta mulu tamei.

30 ^uIa tauu lele'e itemaxu tamei mukalu xe ili'i no anu la angelo vile mune'e muxali noxou Mosesi no xalee lia vitanisi 'alai no anu la'olu ne Sinai. Angelo ne muxali no anu navu vile mu'ani no anu ovu vile. 31 No mine anu mumaisou aloxo ne, la anu mukuluke, la musuku mulai 'alai sou lexe umaisou laixe. La sou mulomusou Tila muvikala. 32 La muvikalanu aloxo 'o, ‘Eni Lataua noxi'a ta xaixasinge. Eni Lataua noxou Avalaamu mo Aisaki xe Iakovo.’ No mine Mosesi mulomu aloxo ne la mu'ume mo umasaxa sou umaisou mii ne uasi.

33 La sou Tila muvikalanu aloxo 'o, ‘Naxexeenu siovesou tavaine ne xo lialia ane nini natutulu no anu 'o ne anu Tavuna. 34 Eni emaisou tu'utu'umaxu ane muxali noxi'a ta tamitemaxeni e ixolu ne Aixiputo ne anu manina. Mo Eni alomusou tamaxa'a, la sou Eni elu'e 'o sou lexe axexee tu'utu'umaxu ane ne noxi'a. Aloxo ne la sou Eni emasaxa lexe apalusine nalivu nalai ne Aixiputo.’

35 ^vAnu Mosesi anusi ane loxo ta mitema mixililiiou mo mivikalanu lexe, ‘'Ena 'ei musosovosine sou lexe naxali nini itema sou naulaxunexi mo nailevinu 'ilixomexi loxo ne?’ Anu anesi ane Lataua upalusou sou uxali loxo itema sou uulaxune'i mo ululusi'a no anu xavi e mune'e noxou angelo ne muxali no anu navu vile mu'ani no anu. 36 ^wAloxo ne la sou anu Mosesi mulutu mulai sou mulaane'i ta mitema ta Isilaeli mixolu ne Aixiputo no anu sosovo iouiou e ta mitema imaisou la ilavusou uasi ne no nano ne Aixiputo mo no Luaki Laouinu xe no xalee lia vitanisi kalumo no nano no anu tauu lele'e itemaxu tamei. 37 ^xAnu Mosesi muvikalane'i ta Isilaeli lexe, ‘Lataua usosovosou vivinge vile no nixi noxi'a ne sou uxali itema sou palomatana loxo eni.’ 38 ^yXe anu Mosesi muavuti la muvikalane'i la aloxo 'o, ili'i la ta xaixasinge ipita no xalee lia vitanisi la Mosesi nesi anu ilo'a ixolu. La sou anu mutelai no la'olu ne Sinai la angelo muvikalanu no 'a vaikala noxou Lataua anu sou mauli mo kaluxu uasi. La sou vaikala ne ane nenge telomusou vaimomo 'o.

39 Ia ta xaixasinge ne imasaxa sou ilomusou vaikala noxou Mosesi uasi. Ane'i misuunu Mosesi xo opone'i pekia'usi sou imasaxa lexe ilivu ne Aixiputosi. 40 ^zLa sou ane'i mivikalanu Aloni lexe, ‘Nexi talavusou lexe mii ma'ia ane muxali noxou Mosesi e anu itema ane munoinge ne Aixiputo sou mune'enenge lai 'o uasi. Aloxo ne la sou vaimomo nini napuinexi ta lataua sou iulaxunexi no vote'i.’ 41 ^aaNo voxo ane ne la ane'i miavuti la mipuinu bulumakau 'olu vile sou milotu noxou aloxo lataua kalavoi noxi'a ne mo miiamau no anu mimii mose'i xe mi'osasou. 42 ^abAloxo ne la sou Lataua muxiu tumalou noxi'a sou lexe ane'i ilotu noxi'a ta 'oto sou opo loxotolo, sou umomomo sou vaikala vile no anu Lavuku noxi'a ta mitema sou palomatana mikaukavunu lexe,

‘Loxovaa ngingi ta Isilaeli ne,
no mine ngingi ngexolu tauu lele'e itemaxu tamei no xalee lia vitanisi,
la ngingi ngave'a ta bulumakau ilo'a ta sipsip sou ngeiamane'i mine'e noxilo?
Uasi.
43 Xo tani alelaxu ane ngingi ngatavulenu ne Eni taasilo uasi.
Anu taasou lataua kalavoi e ualasou lexe Moleki
mo ngingi ngatavulenu sosovosou 'oto noxou lataua kalavoi e ualasou lexe Lepani.
Ngingi ngepuine'i ta lataua kalakalavoi ane ne sou lexe ngalotu noxi'a.
Aloxo ne la sou Eni akusainge no xalee lia tila ane lexe ngingi nga'angingi
sou ngalai ngaxolu no xalee lia tila ne Vaviloni ia ulai la.’
44 Ia avikalangengi lexe no mine ta xaixasinge mixolu no xalee lia vitanisi la mitulusou tani alelaxu noxou Lataua xe Lataua muxolu noxi'a la sou mupamuxanu Mosesi sou mutulusou no anu kaukavuxu anu mumaisou mu'isalili. 45 ^acLa sou ta xaixasinge ilo'a Iosua mine'e ne misukunu tani alelaxu noxou Lataua ane ne sou milaixu no xalee lia ane lexe ilai ixolu no anu. Aloxo ne la sou Lataua musu'uline'i sou muxexene'i ta mitema sou xalee lia ane ne, io Anu muxolu noxi'a sou mupamuxune'i la mulai muxali no mine Deviti muxali. 46 ^adIo Deviti ne Lataua mumasaxau misevile, la sou anu mulinga noxou Lataua lexe anu utulusou taasou lalotu sou Lataua noxou Iakovo uxolu no anu. 47 ^aeIa ili'i, no mine Solomoni muxali, la sou anu molu mutulusou taasou lalotu maninasou. 48 Ia aloxo ne uasi xo Lataua e uxolu teiteixi manina ne itema vile utulusou taasou sou uxoxolu no anu uasi. Aloxo itema sou palomatana muvikala lexe,

49 ^af ‘Tila muvikala aloxo ne.
Opo loxotolo ne anu pulolou e eni axolu mo asaxila'u mutuxu tuala noxilo.
Xe lialia ne sou atulusou tavailo no anu.
Ia tani iou ma'ia ane ngingi ngatulusou lexe Eni taasilo ne
xe tanixu ma'ilaxo 'ava?
50 Xo Eni avolosi ane molu mu'oxonu mimii mukalusi ane ne.’”
51 ^agXe Sutepano muavuti la muvikalane'i ta tatila aloxo 'o, “Ngingi ta mitema sou sangalinge mutomu xe opongengi pekia'u, la sou ngamulinu Uleenu Tavuna uasi loxo ta xaixasinge. 52 ^ahAloxo ne la sou vaimomo 'o eni atali'isinge lexe, itema sou palomatana anevaa ane ta xaixasinge mi'oxo laixe noxou tatei uasi. Ane'i mive'ave'a ta mitema ane'i ane lexe ine'e sou ia'aloxu itema sou 'ilixo muisalili e lexe une'e. Mo vaimomo 'o Anu itema ne mune'e, ia ngingi ngemuxaxu no avo'a ta mitema ta masua sou mivau musoli. 53 Ngingi ngeno'u lapuloto noxou Lataua e ta angelo mivikalangengixu, ia ngingi ngamulinu uasi.”

Ane'i Mivau Sutepano Musoli no Anu Lavo'o

54 Xe no mine ane'i milomusou Sutepano muvikala aloxo ne, la ane'i laiaxa'a mu'oki mo anaxa'a mukalakiki. 55 ^aiIa Sutepano ne mu'ana'ana no anu Uleenu Tavuna xe mutala mutelo no loxotolo la mumaisou lamanaxu Lataua xe mumaisou Iesu no mine ututulu noxou Lataua no xalee no avolu tema. 56 ^ajLa sou anu muvikalane'i aloxo 'o, “Ngamalei 'o, Eni emaisou opo loxotolo mukisi, mo emaisou Itema 'Olu Anu a ututulu noxou Lataua no xalee no avolu tema.”

57 Xe ane'i miavuti la misovolou sangali'a xe miungaunga toxoxa'a manina, io ane'i mukalusi miave milai noxou. 58 La sou mikusau milaixu va'axu no ale no tuala tila ne sou mivau no lavo'o sou lexe usoli. Ia no mine maulu vile e ualasou lexe Saulo ne anu mututulu ne la ta mitema e mitelo vaikala noxou kalumo ne mose'i mita'olunu tokolomoi'a no tava'u.

59 Xe no mine ane'i ivavau no anu lavo'o tei aloxo ne, la anu mulinga noxou Tila aloxo 'o, “Tila Iesu, nano'u uleleli.” 60 ^akIo anu muxola'u tava'u vulenu mulu'e no lia sou mu'ava toxoxa'a, io mulinga lexe, “Tila nalulusou susu noxi'a.” Anu muvikala aloxo ne mukalu, la anu mulapau sou musoli.